Samtang diri pa abelable an kanan Philippine Statistics Authority (PSA) igpapanhatag nga mga ID ha kada Filipino, ngan para han mga nawag-an han ira Voter’s ID, pwede ipakita an kopya han Voters Registration Record (VRR) o COMELEC Certification, nga nagsusumat, residente hin usa nga lugar in usa nga tawo ngan dida hiya nabutos.
Reaksyon ini ni anay COMELEC Election Officer, Mr. Sebastian Caspe, kasumpay hin pira nga mga pakiana ha social media nga kun kay ano, kinahanglanon pa in voter’s ID, kay medesina man an gin-aaro?
Ha usa nga text message, nagsiring ini hi Mr. Caspe nga an Voter’s ID in maiha na nga ginhinay-hinay han diri na panhatagan tungod han kanan PSA namimintana na nga panrehistro han mga molopyo para matagan han National ID.
Ugaring, siring niya, adton mayda pa natitimos nga Voter’s ID in mas mamansayon kundi, diri boot sidngon kun wara na voter’s ID, asya nala iton panubtuban.
“Mayda man Voter’s Registration Record (VRR) nga kumpleto hit thumb mark, signature, status, birthday, birthplace, residence hin saka tawo. Asya man ngani nga dapat personal ini nga aaroon kay pribado ini nga impormasyon hin usa nga tawo ngan, pwede ngani ini gamiton nga VRR hin bis ano nga transaksyon ha goberno,” sering pa han anay opisyal han COMELEC.
Ha usa nga FB post, nagpamatood man liwat an mga matatapuran nga mga opisyales han grupo han mga Senior Citizens, Mrs. Nida Villalon ug Mrs. Myra Lim, nga hira daw gud in masayon la nakakuha hin COMELEC Certification.
Mayda ugaring kabayaran nga P75.00 an pag-aro han Certificate, kundi, ini in mayda resibo ngan makakadamo man ini gamita nga papel.
Nagparig-on pa an pahayag ni Honorable Katlyn Cainday, nga ini nga mga dokumento tika ha COMELEC an pinaka balido nga dokumento han pagigin residente ha usa nga lugar hin usa nga tawo nga nabotos dida han iya bungto.
“Asya ini an pinaka importante nga papeles nga nagsusumat nga Boronganon in usa nga tawo. Diri ini pamulitika, kay iton ordinansa, nasiring man nga dapat Boronganon; kun sugad, it kuwarta hit goberno syodad, in diri angay gastohon para hit diri residente han Borongan, kay kun pasasagdan la an gusto han iba nga iba nga proweba an ipakita, iton in supak han balaud,” dugang pa nga pagklaro han abogada nga magbabalaud.
An kanan Borongan “Libre Medesina” nga programa in nagpapadayon pagserbe ha mga Boronganon nga napila ha City Pharmacy ha lobby han City Hall.
Sumala kan City Mayor Jose Ivan Dayan Agda, diri gad ini dayon mapi -perpekto, labi nga nagtitikang pala. Posible mayda mga maaro hin medesina nga diri pa abelable, kundi iya daw gud gintatalinguha nga mapalit an iba pa nga kinhanglanon nga tambal, bisan ha iba nga kompaniya, kabakyang an pwersa nira Vice Mayor Emmanuel Tiu Sonco ug han mga membro han Sangguniang Panglunsod.
Aada daw daman an mga doktor han syodad, hira Doktor Daisy Sacmar, Doktor Patricia Apita, Doktor Raul Villanueva, Doktor John Kelly Cainday, Doktor Bernadette Galacan ug Doktor Katrina Carmel Rapada nga iya tinatapuran makakabulig hin maupay han hapsay nga pag patuman han mga programa panlawas han goberno syodad.
Pira naman nga molopyo ha iba nga lugar an nakaka sering, “Sana all.” #
#DukwagAgrikultura
#LibreMedisina
#BoronganonDisiplinadoAko
