Ginbuhat an ika-tulo ngan urhi nga pay-out han “Tulong Panghanap-buhay sa ating Disadvantaged/Displaced Workers” (TUPAD) ha di pala maiha Barangay Camada covered court.
Pinangunahan ini nira Engr. Aleksie D. Abellar, OIC-Senior LEO, han DOLE Eastern Samar, Rodito Capito, Senior Administrative Assistant III, han Barangay Affairs Office, Leonaldo Ador Jr. ngan Mr. Napoleon Bebita, komo representante ni Cong. Maria Fe Abunda han CDO Eastern Samar.
Sumala kan Bebita, “Ini yana nga mga “beneficiaries” in amo adton waray pakatagamtam han mga ayuda han national, provincial ug city government han pira ka bulan nga naglabay.
Dugang pa niya nga an pondo in ginahin tikang ha CDO o, opisina ni Congresswoman Maria Fe Abunda, nga kun diin an mga Estehanon urog na labi an Boronganon in makatagamtam, labi na adton wara pa katagi hin ayuda pinaage han DOLE ha ilarum han TUPAD.
Igin pahayag naman ni Abellar, nga an TUPAD in usa nga “Safety Net” o ayoda nga Program han DOLE nga makausa la matatabo o, one-time cash assistance.
Ginsagda ni Abellar an mga benefeciary nga gamiton la hin maupay an hinabang nga kantidad, subay han ira importante nga pangi-nginahanglan kay makuri yana it panginabuhe ngan haros magkanap na it ekonomiya hit Pilipinas.
Ine daw nga kwarta in tikang ha mga buwis han mga tawo salit dire ini gamiton hin pag-sugal o agud ine in dire masayang.
Nabaroan naman kan Mr. Rodito Capito, han City Barangay Affairs Office nga ginkilala an mga beneficiaries han TUPAD pinaagi han pakipag sumpayan han DOLE kan City Mayor Jose Ivan Dayan Agda.
Dugang pa ni Capito nga dire unta umoba an iba nga waray makatagamtam han pay-out, kay daw di man dako it pondo nga pwede magdudrungan an ngatanan nga kablas tungod kay nawaraan trabaho an padre de pamilya tungod han pandemya.
“Sige sige la ini nga proyekto hit aton it gobyerno pinaagi han paniguro ni Mayor Agda, Congresswoman Abunda sugad man han DOLE, ayaw, salit, waray rason nga mag-ibi-ibiay,” sering ni Capito.
Labot pa hine, igintugon pa ni Mayor Agda kan Capito nga igpanawagan ha mga beneficiary nga kumbinsiron hira nga magpabakuna kay makakaproteksyon ini ha mga tawo ngan kaupayan man ini para hit syudad urog na labi hit barangay ngan probinsiya.
Ginsumat pa ni Capito nga an mga dire kwalipikado an mga Senior Citizen kumarawat hine TUPAD kay nakakatagamtam man hira han Social Pension ngan Monthly Monetary Allowance, sugad man han Barangay Officials, Barangay Health Worker, Tanod kay nasuhol naman ha Barangay ug ha City Government, sugad man han nakatrabaho na ha TUPAD han mga nakalabay nga mga bulan.
Gintugon pa han DOLE nga an mapakada han pay-out in kinahanglan nga naka-facemask, faceshield ngan magsusunod han “physical distancing.”
Nanhatag naman an City Governement han Borongan hin faceshield ha mga beneficiary para han ira proteksyon kontra COVID-19.
Inabot hin 203 nga benefeciary an natagan han Borongan City, ug an kada usa ha ira in nakakarawat hin tag 4,875 ka pesos tikang han ira 15 diyas nga pagtrabaho tikang han Enero 25 ngada Pebrero 5, 2021.
Dugang pa ni Capito nga nagsisiguro an amay han siyudad nga magkamay-ada na bakuna kontra COVID-19 an iya mga molopyo salit ginsasagda an mga tawo nga suportahan ine. #
#BoronganonDisiplinadoAko
