Personal nga iginduhol nira City Mayor Jose Ivan Dayan Agda, Vice Mayor Emmanuel Tiusonco, ngan CSWD Officer Verina Amoyo an tseke nagkakantidad hin Php50,000 ngadto han duha (2) nga nagin active member ngan Php10,000 kada usa ngadto han 69 nga supporters/unit militia nga mga taga Barangay San Andres han nakalabay nga Martes, Setyembre 5.
An ayuda pinansyal nga kinarawat han mga former rebels in tikang han Borongan City Local Social Integration Program (LSIP) Assistance pinaagi han Borongan City Social Welfare and Development Office.
Naghatag hin mensahe hi CPT Allan S Marquez (INF), PA, Acting Executive Officer, kun diin iya ginduon nga an LSIP in programa han ahensya han goberno nga nabulig hadton mga nagkabalik ha pi-od han goberno agud makapagtikang hin bag-o nga kinabuhi kaupod an ira pamilya.
Sumala naman kan Mayor Agda ha iya mensahe, “Sana in nga iyo pagbalik ha pi-od hiton aton gobyerno, in maging malinampuson, ngan maging dayuday, kay hi kami ngahi Vice Mayor Emman, hi Lieutenant Commander Tria, hi Colonel Amarro, hi Mana Verina ngan iba pa nga mga departamento hit aton City Government, in diri maudong hit paghatag hit harani ha kamatuoran nga serbisyo publiko”.
Ginsumat pa niya an plano nga himu-an an Barangay San Mateo hin Secondary High School kun diin harani ini nga barangay han San Andres ngan diri na hirarayo an mga estudyante han pangiskuyla. Tinuman na liwat an maiha na nga hingayap han mga molopyo nga kalsada ha San Andres (Upper) nga diin ha pagkayana in gin-iimplementar na ngan madali na mahuman.
Siring pa niya nga aada pa an Dukwag Agrikultura nga programa han syudad kun diin pwede hira makapagtikang hin pakabuhe nga waray porciento han ira huhudmon nga kapital.
Nagpasalamat liwat hi Colonel Rico Amaro, Deputy Brigade Commander 802Bde, PA, ha maupay nga relasyon ngan kolaborasyon han City Government of Borongan ngan 78th Infantry Batallion nga pinangungunahan ni Lieutenant Commander Allan Tria. Iya igintugon pa han mga former rebels nga kumbinsiron pa an iba nga ira urupod ngan kilala nga bumalik liwat ha goberno. Patapod pa niya nga an mga igin-saad nga mga programa ha ira in matutuman, tumapod la hira.
Mahinunumduman nga nagka-mayda hin Oath of Allegiance to the Government an 71 nga former rebels han nakalabay nga Agosto 19, gindumara ha Barangay San Andres (Upper).
