Pito nala ka-semana tikang yana nga adlaw, makakapagbaligya na hin 55 nga mga kabaktinan an 11 nga indibidwal nga parag-uma han Brgy. Benowangan.
Ine in ginsiring ni Mr. Macario Gabornes kahuman bisitahon han Brgy. Benowangan Technologist, Jumahri Cinco kaupod an 4 pa nga mga Agricultural Technologists, kakulop Pebrero 17, 2022.
“Madali la an amon pakatagamtam han programa. Katapos mapirmahan an amon loan agreement, binuligan kami ni Sir Cinco han City Agriculturist Office han pag canvass ngada han am pakapalit ubos. Waray kami bulagi ni sir Jomarie pagturoy han mga kapasian,” pahayag han usa nga benepisyaryo han Dukwag Agrikultura, Cynthia Capones.
Dugang pa ni Capones, hira in hinatag la han ira valid ID ngan barangay certification kahuman gin proseso na an ira loan agreement.
Samtang 13 naman nga mga parag-uma in nabuligan pagkulawi han mga rekisitos para hira in sumunod makatagamtam han programa.
“Nahiyok gad ak nga mayda hine nga programa kay it ak Tatay in lagas na dire na hiya magbibinuhat hin magbug-at nga darad-on tikang ha kagugub-an,” siring ni Daisy Amado usa nga taga Brgy. Benowangan.
Labot la han pagbaktinan, 2 pa nga mga parag-uma in gin bisita nira Ma. Luz Cabo an section head han Research and Extension ngan iba pa nga mga technologist, para han mga pananom sugad han Cacao ngan Cassava.
An pagbisita in kinabulan nga pag ‘monitor ngan supervision’ han City Agriculturist Office han 61 nga barangay han LGU-Borongan.
#DukwagAgrikultura
