Ginbuhat an Livelihood Assistance Grant (LAG) Payout ha Eastern Samar Police Provincial Office o ESSPO Gymnasium, Brgy. Alang-alang Borongan City, yana nga adlaw Nobyembre 17, 2022.
328 nga mga Former Rebels (FRs) han 14 nga mga bungto han Eastern Samar, an nakatagamtam hini nga bulig, ini in an mga munisipyo han Arteche, Balangiga, Dolores, Maslog, Can-avid, Gen. MacArthur, Giporlos, Llorente, Maydolong, Oras, Quinapondan, San Policarpo, Taft ngan syudad han Borongan.
Pinaagi ini kan Senator Bong Go nga binakdaw nga guest of honor han nasabi nga payout, nagpa-abot liwat hiya hin mga pahalipay ngan tseke ha pira nga mga casualties ngan survivors ha mga nahinabo nga armed conflict ha mga nga bungto ha probinsya han Eastern Samar.
Nag-esplekar naman han rationale han haliputay nga programa antes magtikang han pagpa-angbit han mga ayuda hi Hermanito S. Manglao, Regional Coordinator han Sustainable Livelihood Program ha Rehiyon 8.
“Nahimugso in nga LAG para han aton mga kabugtuan nga may-ada guti-ay nga tinatawag nga ‘armed conflict ngan mga ‘vulnerable affected areas”, so ine nga commitment han DSWD nga paghatag hin livelihood assistance para makahatag ha ira hin puhunan ha ira pakabuhe. Ini nga SLP is a convergence effort, we must say it’s a partnership to our local officials, military ug police ngan mga private organizations para mahipadangat ha aton kabugtuan,” pulong ni Manglao.
An kada tagsa in nakakarawat hin P15,000.00, ngan dire ini baraydan pero ini in imo-monitor han mga Project Evaluation Officer. Ini in pagsiguro nga nga an nasabi nga livelihood assistance in ungod nga mahipundar han gin-plano nga pakabuhe han ira pamilya.
Naghatag naman hin mensahe hi Eastern Samar Gov. Ben P. Evardone, kon diin iya ginduon nga napili hira matagan han nasabi nga ayuda para hira in umabat ngan tumuod nga may-ada goberno nga nabulig ha ira para makapagtikang han panibag-o nga kinabuhi pinaagi han nakarawat nga bulig pinansyal.
Presente liwat han nasabi nga payout hira Vice Governor Maricar Sison-Goteesan, 801st Brigade Commander COL Lenart Lelina PA ngan Provincial Director PCOL Matthe Aseo, PNP Eastern Samar.
Nagparisyo pa ngan nagin malipay an mga tinambong han nasabi nga payout dara kay kaupod pa ni Sen. Bong Go hi Philip Salvador, beterano nga Filipino Actor.
