Tablada nga gin-kaurusahan nga magin P12 nala, imbis nga P15.75 an pasahe ha tricycle para han short ride.
Dida ini han katatapos pala nga Committee Meeting and Dialogue yana nga kulop, Marso 17, nga gin-atenderan han mga TODA Presidents, tricycle drivers ug operators, ha SP Session Hall.
Pinangunahan han Chairman hiton Committee on Transportation and Communication, Hon. Melcho Arago, an miting nga nag-tikang han paghingaday han Petition nga igin pasa han mga Tricycle Drivers nga nag hingita hin umentado nga pasahe tikang han P9 ngadto hin P15.75 para han short ride.
Siring ni Mr. Napoleon Bebita, BCTT Officer, ha iya paghatag hin mga pag analisar han iksakto nga pamasahe, iya igin-paangbit in usa nga “Actual Study” nga gin buhat han ira opisina nga nagpresentar hin mga datos han magiging “total” nga kikitaon han mga tricycle driver kun mag-umento hin 75%.
Kinambyo naman an mga TODA Presidents han ira mga karuyag sidngon mahitungod han ira petisyon.
Sumala kan Romualdo A. Arre, BCF Toda President, nag pasa hira hin Petition dara han padayon nga pag hinataas han presyo han gasolina, usa liwat nga rason in natigdaan hira nga largo igin pa tuman nga pag habubo han pasahe kun diin damo nga tricycle drivers in kinalasan kay waray hira hibaro nga hinabubo na an pamasahian.
Kahuman han magpaluyo nga pagplastar han mga karuyag sidngon han magka dirodilain nga tindog, nagkaurusa hira han angay isalawad nga pasahe para pag isristoryahan ha Konseho.
Usa na han ginkaurosahan an tag P12 nala nga pasahe para han “short ride.”
Ginlalauman nga kahuman hine, mahipapasa hin sagilayon ha Sangguniang Panlungsod ini nga bag-o nga hingyap ha pamasahe, para mahipatuman an hingyap ug patas nga solusyon para han ngatanan nga sektor.